BISS-Timeline №7 (ліпень 2013 г.)

BISS  прадстаўляе сёмы выпуск BISS-Timeline — штомесячны маніторынг палітычнай, эканамічнай, сацыяльнай і культурнай сфер. У ім аналізуюцца падзеі,  якія адбыліся ў ліпені 2013 года.

Ліпень быў выключна багаты на знешнепалітычныя падзеі. У пачатку месяца А. Лукашэнка прымаў парад у Мінску з нагоды Дня Рэспублікі ў кампаніі прэзідэнтаў Венесуэлы і Лаоса. А 22 ліпеня Уладзімір Макей упершыню пасля прыпынення еўрапейскіх санкцый наведаў Брусэль і ўзяў удзел у міністэрскай сустрэчы ў межах праграмы «Усходняе партнёрства».

Унутраная палітыка ў гэты перыяд  мела супярэчлівы характар.  З аднаго боку да паўтара гадоў пазбаўлення волі быў асуджаны лідэр незарэгістраванага грамадскага аб’яднання «Саюз маладых інтэлектуалаў» Андрэй Гайдукоў (прадстаўнікі апазіцыі і праваабарончай супольнасці звязалі крымінальны пераслед Гайдукова з яго актыўнай грамадскай дзейнасцю і прызналі яго асуджэнне палітычна матываваным). З другога — беларускія ўлады пайшлі на саступкі Еўрасаюзу і змякчылі сваё стаўленне да іншых прадстаўнікоў апазіцыйнага руху.

Падзея, якая можа значна паўплываць на развіццё эканомікі краіны, здарылася 29 ліпеня — у гэты дзень «Уралкалій» абвясціў аб спыненні экспартных паставак праз «Беларускую калійную кампанію» (БКК) – сумеснага з «Беларуськаліем» трэйдара калійных угнаенняў. Выхад «Уралкалія» з БКК фактычна значыць знікненне буйнога цэнавага рэгулятара на рынку калійных угнаенняў, што выклікае непазбежнае значнае падзенне цэн на калій у выніку павялічэння канкурэнцыі.  Чакаецца, што цэны знізяцца да ўзроўню цэн маржынальных вытворцаў, якія складаюць каля 250–300 даляраў.

Асноўнымі падзеямі ліпеня ў сацыяльнай сферы сталі актыўныя меры Міністэрства працы і сацыяльнай абароны па рэарганізацыі сістэмы сацыяльнай падтрымкі з мэтай скарачэння яе аб’ёму і звужэння кола асобаў, якім яна аказваецца. Тое, што гэтыя крокі робяцца на фоне патрабаванага па фармальных прыкметах павышэння пенсій і бюджэту пражытачнага мінімуму (БПМ), кажа пра тое, што цяперашняя сістэма сацыяльнай абароны не можа быць забяспечана наяўнымі бюджэтнымі сродкамі.

А культурнае жіццё ліпеня вызначылася шэрагам святаў і фестываляў.  Пры гэтым, масавасць, залішняя пафаснасць і відавочная ідэалагізацыя ў чарговы раз сведчылі пра прыхільнасць афіцыйных уладаў да старой, «савецкай» мадэлі правядзення такіх мерапрыемстваў, пра нежаданне і няўменне надаць ім сучасны крэатыўны характар. «Мяккая беларусізацыя» па-ранейшаму ажыццяўляецца пераважна сіламі няўрадавых арганізацый і прыватных ініцыятыў.

Чытайце BISS-Timeline за ліпень  2013 г. у фармаце pdf