Беларускі знешнепалітычны індэкс №19 (сакавік–красавік 2014 г.)

Друкаваная версіяPDF версія

BISS прадстаўляе дзевятнаццаты выпуск «Беларускага  знешнепалітычнага індэкса», у якім аналізуюцца пяць напрамкаў знешняй  палітыкі Беларусі ў сакавіку–красавіку 2014 г.

Афіцыйны Мінск імкнуўся забяспечыць сабе максімальна спрыяльныя ўмовы ў Еўразійскім эканамічным саюзе, перш за ўсё, за кошт вырашэння  праблемы з пералічэннем экспартных пошлін за нафтапрадукты ў расійскі  бюджэт. Адносна падзей ва Украіне Беларусь ухілялася ад безумоўнай  падтрымкі Расіі, што можа разглядацца як метад ціску на Маскву ў  перамовах аб стварэнні ЕЭС. На працягу траўня варта чакаць ад афіцыйнага  Мінска гучных публічных заяў аб неабходнасці роўных умоў у межах АЭП і  немагчымасці падпісання дамовы аб стварэнні ЕАЭС без гэтага кроку. Так  ці інакш, дагавор аб стварэнні ЕАЭС Мінскам будзе падпісаны, калі толькі іншыя знешнія абставіны не сарвуць яго падпісанне.

У беларуска-еўрапейскіх адносінах працягнуліся актыўныя дыпламатычныя кантакты і кансультацыі. Аднак відавочнага прагрэсу дасягнуць пакуль не ўдалося. Асноўныя праблемы ў адносінах Беларусі і ЕС застаюцца тымі ж. Змястоўны парадак дня, які пачаў фарміравацца ў канцы 2013 г., пакуль знаходзіцца ў зародку.

У сакавіку–красавіку 2014 г. беларуска-кітайскія адносіны развіваліся пад уплывам узрастання расчаравання беларускага кіраўніцтва ў перспектывах гэтага супрацоўніцтва. Кітайскае лобі і звязаныя з ім кітайскія кампаніі разгарнулі імітацыю актыўнай дзейнасці для дэманстрацыі прарыву ў адносінах. У гэты перыяд працягнулася тэндэнцыя на рэалізацыю супрацоўніцтва, якое выгадна, у асноўным, толькі Кітаю.

Беларусь спрабуе аднавіць свае ранейшыя адносіны з Іранам, а таксама наладзіць больш блізкае супрацоўніцтва з краінамі Блізкага Усходу. У адносінах з краінамі, якія развіваюцца Мінск укараняе новыя формы кааперацыі, не абмяжоўваючыся выключна нарошчваннем тавараабароту. Урад Беларусі па-ранейшаму будзе ўважліва сачыць за міжнароднай кан’юнктурай і яе змяненнем, спрабуючы ўхапіцца за найменшую магчымасць пашырыць свае знешнія сувязі.

Адносіны з Украінай набылі для абодвух бакоў стратэгічнае значэнне, пра што сведчыць рэкордны рост індэкса. Беларусь зацікаўленая ўтрымаць адзін з найбуйнейшых рынкаў збыту сваёй прадукцыі, а Кіеў зацікаўлены ў максімальнай бяспецы сваёй паўночнай мяжы і бесперабойных пастаўках нафтапрадуктаў. А. Лукашэнка здолеў хутка ўсталяваць дружалюбныя адносіны з новым празаходнім кіраўніцтвам Украіны. Акрамя таго, геапалітычныя зрухі ў рэгіёне вяртаюць яму надзею на аднаўленне палітыкі лавіравання паміж Расіяй і Захадам.

Чытайце Беларускі знешнепалітычны індэкс №19 у фармаце pdf